கூகுளுக்கு சவால் விட இன்னும் ஒரு சர்ச் என்ஜின் கிளம்பி வந்துள்ளது. அதன் பெயர் பிளக்கோ.
கூகுளுக்கு எதிராக ஏகப்பட்ட சர்ச் என்ஜின்கள் வந்து விட்டன. இருந்தாலும் கூகுளை இதுவரை யாராலும் அசைக்க முடியவில்லை. இந்த நிலையில் தற்போது புதிதாக பிளக்கோ என்ற புதிய சர்ச் என்ஜின் வந்துள்ளது. நேற்று தனது பீட்டா தளத்தை பிளக்கோ தொடங்கியுள்ளது.
இதுகுறித்து பிளக்கோ தலைமை செயலதிகாரி ரிச் ஸ்கிரென்டா கூறுகையில், எங்களது நிறுவனத்தை ஆரம்பித்தபோது, எங்குமே தேட முடியாதவற்றையும் கூடஇங்கு தேடலாம் என்ற நிலையில் புதிய சர்ச் என்ஜின் இருக்க வேண்டும் என முடிவு செய்து விட்டோம். அந்த அடிப்படையிலேயே புதிய சர்ச் என்ஜினை வடிவமைத்துள்ளோம் என்றார்.
பிளக்கோவில் ஸ்லாஷ்டேக்ஸ் என்ற புதிய ஒரு அம்சம் உள்ளது. அதாவது, தேவையில்லாத தளங்களையெல்லாம் நாம் பெறாத வகையில் நமது தேடுதலை மேற்கொள்ள முடியும். நமக்கு எது தேவையோ அது மட்டுமே கிடைக்கும் வகையில் தேடுதலை மேற்கொள்ள இந்த ஸ்லாஷ்டேக் பயன்படுகிறது. குறிப்பாக ஸ்பாம் சைட்டுகள் உள்ளிட்டவற்றை இது காட்டாது.
இந்த புதிய சர்ச் என்ஜின் குறித்து சர்ச்என்ஜின்லேன்ட் இணையதளத்தின் தொழில்நுட்ப தலைமை எடிட்டர்டேனி சலிவன் கூறுகையில், கூகுளுக்கு போட்டியாக எத்தனையோ வந்து விட்டன. அத்தனையும் போய் விட்டன. அந்த வகையில் இப்போது பிளக்கோ வந்துள்ளது. இதனால் கூகுள் அடிபடும் என நான் கூற மாட்டேன். கூகுளில் நிறைய தவறுகள் இருந்தாலும் கூட அது இன்னும் உறுதியாகவே உள்ளது என்றார் சலிவன்.
0 comments:
கருத்துரையிடுக