கன்னியாகுமரி மாவட்டத்தில் எஸ்எஸ்எல்சி தேர்ச்சி பெற்ற மாணவ, மாணவிகள் தங்கள் பள்ளிகளிலேயே பதிவு செய்து கொள்ள வேலைவாய்ப்பு அலுவலகம் சிறப்பு ஏற்பாடுகளை செய்துள்ளது. இது தொடர்பாக மாவட்ட வேலைவாய்ப்பு அலுவலர் பெ. ரவீந்திரன் செவ்வாய்க்கிழமை கூறியதாவது:
பள்ளியிறுதி தேர்ச்சி பெற்ற மாணவ, மாணவிகளுக்கு மதிப்பெண் சான்றிதழ் 15.6.2010-ம் தேதி வழங்கப்படவுள்ளதாக தெரிவிக்கப்பட்டுள்ளது. இதையடுத்து அச் சான்றிதழ்களை மாவட்ட வேலைவாய்ப்பு அலுவலகத்தில் பதிவு செய்வதற்கு ஏராளமான மாணவ, மாணவிகள் நாகர்கோவிலில் மாவட்ட வேலைவாய்ப்பு அலுவலகத்தில் திரள்வர். இதனால் பல்வேறு சிரமங்கள் ஏற்படுகின்றன. இதை தவிர்க்கும் பொருட்டும், மாணவ, மாணவிகளின் வசதிக்காகவும் மாவட்ட வேலைவாய்ப்பு அலுவலகம் சிறப்பு ஏற்பாடுகளை செய்துள்ளது.
பள்ளி மாணவ, மாணவிகள் மதிப்பெண் சான்றிதழ்களை பெற்றதும், அப் பள்ளிகளிலேயே பள்ளி நிர்வாகத்தால் வேலைவாய்ப்புக்காக பதிவு செய்யப்படுவார்கள். எனவே மதிப்பெண் சான்றிதழ் பெறுவதற்கு செல்லும்போது குடும்ப அடையாள அட்டையின் ஜெராக்ஸ் நகல், மதிப்பெண் சான்றிதழின் ஜெராக்ஸ் நகல் மற்றும் பள்ளி மாற்றுச் சான்றிதழின் ஜெராக்ஸ் நகல் ஆகியவற்றை சான்றொப்பம் பெற்று பூர்த்தி செய்யப்பட்ட வேலைவாய்ப்பு பதிவு படிவத்துடன் இணைத்து பள்ளியிலேயே அளிக்க வேண்டும்.
பள்ளி நிர்வாகத்தால் பூர்த்தி செய்யப்பட்ட படிவங்கள் வேலைவாய்ப்பு அலுவலகத்தில் ஒப்படைக்கப்படும். இதையடுத்து உரிய பதிவு அட்டைகள் வேலைவாய்ப்பு அலுவலகத்தில் வழங்கப்படும். அந்த அட்டைகள் மாணவ, மாணவிகளுக்கு அவர்களது பள்ளிகளிலேயே அளிக்கப்படும். எனவே 2010-ம் கல்வியாண்டில் எஸ்எஸ்எல்சி தேர்ச்சி பெற்ற மாணவ, மாணவிகள் வேலைவாய்ப்பு அலுவலகத்தில் பதிவு செய்ய அந்த பள்ளிகளிலேயே ஏற்பாடுகள் செய்யப்பட்டுள்ளன. மாணவ, மாணவிகள் வேலைவாய்ப்பு அலுவலகத்துக்கு வரத் தேவையில்லை என்றார்.
இந்நிலையில் அலுவலக பதிவுக்கான படிவங்களை அந்தந்த பள்ளிகளுக்கு வழங்கும் பணியை நாகர்கோவிலில் மாவட்ட முதன்மை கல்வி அலுவலகத்தில் முதன்மை கல்வி அலுவலர் பொன்னையா செவ்வாய்க்கிழமை தொடங்கி வைத்தார்.
0 comments:
கருத்துரையிடுக